戰後初期蔣介石政權處理台灣語言議題ê態度hām手路ê轉變

公元1945年二戰結束，蔣介石根據麥克阿瑟第一號命令派軍到台灣ham北越代表聯軍接受日本軍ê投降。蔣介石政權接受日本軍投降soah並無sûi離開台灣，顛倒繼續佔領台灣。蔣介石政權ti1946年設台灣省行政長官公署國 語推行委員會，後來ti1948年koh改組做台灣省政府國語推行委員會。Chit-ê委員會就負責hit當時ti台灣chhui-sak中國北京話ê khang-khòe。國語推行委員會ti初期對台灣本土語文採取包容、透過台語學中國話ê政策。像講，in ti1950年出版《台語會話》，1952年出版《台語方音符號》。M-koh，1960年代因為中 國化政策ê實施，開始加強去台灣化，嚴禁台語koh ka台語改名做閩南語。本論文ê目的就是beh探討二戰結束後蔣介石政權處理台灣語言議題ê態度ham手路ê轉變。